TUNJUK AJAR TEGUR SAPO
KEPADO PENGANTEN BARU
BISMILLAH HIRROHMANIRROHHIM
ASSALAMUALAIKUM WARAHMATULLAHI WABAROKATUH
Datuk – datuk tuo – tuo tenganai, alim ulama, cerdik pandai kaum kerabat, sanak keluargo, nang kecik idak disebut namonyo, yang gedang idak pulak kami himbaukan gelarnyo, hadirin yang kami mulyokan.
Pado hari iko, hari yang baik ketiko elok, menjadi utang bagi kami yang tuo – tuo kepado yang mudo – mudo, untuk memberikan tunjuk ajar tegur sapo, semacam mano kato pepatah adat :
“ SEMAKIN PADEK MAKIN DIAJAR,
SEMAKIN TAU MAKIN DISAPO “
Untuk itu aninglah elok – elok, Tunjuk Ajar Tegur Sapo kami iko, adat mengatokan sekecik – kecik batang samantung dibelukar, kalu babuah lah tuo namonyo, batang pule batingkat naek, ninggalkan ruas kadengan buku, parange bujang tinggallah dibujang, parange gadis tinggallah digadis, jangan leko diujung tanjung, nengok aek anyut ka ilir, jangan leko pulak dikebun bungo, nengok bungo sedang bakembang, lupo kain idak basiring, lupo dipunggung idak baso’ ak, lupo dapur idak barasap.
Adopun tujuan perkawinan, selain membino rumah tanggo suami isteri nang baik, jugo membino hubungan duo keluargo nang akrab dan serasi, dalam adat dikatokan :
“ BAKAMPUH NAK LEBAR, BA’ ULAS NAK PANJANG
JANGAN BAKAMPUH LEBAR KOYAK
JANGAN PULAK BA’ ULAS PANJANG PUTUS “
Robah sikap sedari awal sebagai suami isteri, dalam seloko adat dikatokan :
“ UBAH TUTUR – AJAK BASO “
Misalnyo :
· Pa’ Cik Baso Isteri, Pa’ Cik Baso Suami
· Mamang Baso Suami, Mamang Baso Isteri
· Bibi Baso Suami, Bibi Pulak Baso Isteri
· Ma’ Edo Baso Isteri, Ma’ Edo Pulak Baso Suami.... dst
Dalam rumah tanggo, kalu terjadi silang sengketo atau selisih pendapat, jangan menghakimi dewek, kareno adat kito adaolah :
“ RUMAH BATANG GANE, KAMPUNG BATUO,
NEGERI BABATIN
LUAK BAPANG HULU, RANTO BAJENANG,
SERTO ALAM BARAJO “
Untuk itu tempolah semua penyelesaian secaro belembago dan bermusyawarah, dalam Al- Qur’ an dijelaskan :
“ Jika Terdapat Gejala Perpecahan Dalam Suatu Keluargo, Mako Kirimkanlah Putusan Hakim, Dari Pihak Laki – laki dan Pihak Perempuan, ji9ka menghendaki perbaikan, Allah akan Melimpahkan Taufiknyo Kepado Mereka “
Dimaso nang katibo, mano kalo rumah tanggo nang kamu bina iko, mengalami cobaan nang silih berganti, baik nang datang dari kamu nang baduo, maupun nang datang dari pihak lain, nang membawo pertengkaran dan perselisihan.
Ingatlah anakku nang baduo, pertengkaran dan selisih pendapat adolah seni dalam keluargo, idak ado keluargo nang luput dari pertengkaran taupun selisih pendapat, kalu idak batengkar dan selisih pendapat kenyok / bukan rumah tanggo namonyo.
Oleh karena itu anakku nang baduo, hindari pertengkaran nang alkan membawo kepintu perceraian, “ Gayu Selamat “ hindari kato – kato “ Talak “ kareno kato – kato itu adolah nang dibolehakan, namun sangat dibenci Allah SWT, lebih tegas lagi “ Perbuatan Halal Tapi Amat Dimurka Allah “ Ingat Anakku, “ Allah SWT Menitip Talak Kepado Laki –laki dan Menitip Rahim Kepado Perempuan “ Tolong Dijago Baik – baik.
WAHAI ANANDA BADUO
( Keduo Penganten )
............................DAN ............................
Kalu terjadi pertengkaran dan perselisihan, seperti nang kami kemukokan tadi, selesaikan secepat mugkin diantaro kamu baduo, dengan caro arif bijaksano, bermusyawarah dengan penuh keterbukaan dan raso kasih sayang, jangan pulo ilang berito macam kijang lepas karimbo, macam batu tenggelam dilubuk, macam pasir ditambak ka buluh, hilang dipicit macam angin, habis digenggam macam aek.
Untuk itu, sisik sianglah elok – elok, sisik sampe ketunggul, siang sampe kedasar, kurang sisik tunas menjadi, kurang siang rumput tumbuh, supayo runding nak sampe sudah, kareno itu, dalam menimbang suatu perkaro bapadomanlah kepado orang nang tuo – tuo, “ Kok Mengaji Diatas Kitab, Kok Meratap Diatas Bangke, Mengaji Idak Bakitab - Kaji Idak kan Dapat, Meratap idak Diatas Bangke – Aek Mato Idak Keluar “
KHUSUS KEPADO ANANDO
( Penganten Laki – Laki )
............................ BIN ............................
Mulai hari iko menurut adat, kamu adolah sebagai orang semendo dirumah iko, jadilah semendo nenek mamak, sesuai nang dikahendaki Adat dan Syarak, yaitu harus mempunyai sifat dan watak nang baik dan halus budi bahasanyo. “ Tau Syah dengan Batal, Tau Disukat dengan Gantang, Tau Bakati dengan Berat, Tau Membagi Samo Banyak, Dimano Bumi Dipijak Disitu Langit Dijunjung, Dimano Tamilang Dicacak Disitu Tanaman Tumbuh, Dimano Ranting Dipatah Disitu Aek Disa’ uk “.
Jangan jadi semendo Gajah Minong, maksudnyo idak tau adat dan baso kepado nang tuo, idak tau adat dan baso kepado nang mudo, idak tau adat baso dengan sanak ipar, idak tau adat dan baso dengan nang samo gedang. Jangan jadi semendo kacang Miang, belum awak datang belum orang Hiruk Pikuk, jangan semendo Langau Ijo, anak lahir awak kawin lagi digena lain.
KHUSUS KEPADO ANANDO
( Penganten Perempuan )
............................ BINTI ............................
Mulai dari selesai akad nikahmu, mako tanggung jawab orang tuo mu beralih kepado suamimu, sesuai dengan kedudukan sebagai seorang Isteri, mako perange gadis tinggallah digadis, kareno sudah ado ketentuan nang membatasimu baik menurut Adat maupun Syarak. Kini iko bagi anando, keataslah dikukung dahan, kabawah lah dipasung baner, kareno itu ciptakan raso cinto dan sayang, serto suasana tentram dalam rumah tanggo dan lingkunganmu.
Kabukit samo –samo mendaki, kelurah samo – samo menurun, kemudik serentak satang, kilir serengkuh dayung, hati gajah samo dilepeh, hati tungau samo dicecah, macam aur dengan tebing, tebing runtuh aur tabawak.
Terakhir kepado anando baduo sayo sampekan 20 Sifat nang dilarang Syarak dan dibenci Adat yaitu :
1. Hati Selalu Bimbang
2. Mato Selalu Rambang
3. Perange Selalu Sumbang
4. Orang Bajalan Lurus Awak Menyelimpang
5. Orang Nak Nempuh Awak Mengempang
6. Bacakap Dengan Orang Awak Membelakang
7. Kalu Disusruh Awak Membangkang
8. Katengah Orang Babaju Kutang
9. Orang Nak Masuk Awak Tegak Dilawang
10. Idak Sembahyang
11. Banyak Hutang
12. Hutang Gedang Dibawak Tidur Siang
13. Kalu ditage Marah ka Orang
14. Awak Kecik Perange Macam Orang Gedang
15. Awak Gedang Perange Macam Kerbo Jalang
16. Perange Jahat Macam Jelatang
17. Siang Tidur Malam Jadi Musang
18. Awaklah Babini Masih Ngaku Bujang
19. Awak Tuo Mato Keranjang
20. Babini Dengan Nang Kecik, Tapi Masih Linjang Kepado Ayuknyo Nang Gedang
“ Kalu iko Masih Dipegang, Lokak Kami Tarik Melintang
Mohon maaf salah dan janggal mohon maaf wassalamualaikum wr wb.
